अनुप बरालले प्रदीप खड्कालाई किन हिंडाए खाली खुट्टा ?
निर्देशक एवं अभिनेता अनुप बरालले युवा पुस्ताका नायक प्रदीप खड्काको प्रशंसा गरेका छन् । अभिनयमा विविधता आओस् भनी प्रदीपले सोच्ने गरेको भन्दै अनुपले उनको प्रशंसा गरेका हुन् ।
अनमोल केसी, पल शाह र प्रदीप खड्का बारे टिप्पणी गर्नुस् भनी सञ्चारकर्मी ऋषि धमलाले ‘धमलाको हमला’ मा सोधेको प्रश्नमा अनुप भन्छन्, ‘आफ्नो काममा भेराइटि आओस् भनेर सोच्ने चाहिं प्रदीप खड्कालाई देखें । उसले कामले पनि प्रमाणित गरेको छ ।’ अनुप सम्झन्छन्, ‘रमाइलो किस्सा के छ भने, ऊ जुम्लाको क्यारेक्टर गर्दैछ । ऊ चाहिं शहरको रहनसहनमा हुर्किएको हो । वर्कसप गर्दै गर्दा मैंले के भनें भने ‘तिमी त स्टार मान्छे । तिमी खाली खुट्टा हिंडने चरित्रमा छौं । जुम्लामा तिमी खाली खुट्टा हिंड्नु पर्ने हुन्छ । तिमी एकान्तकुनादेखि अनामनगरसम्म खाली खुट्टा हिंडेर आउनु’ भनें । माक्स लगाएर ऊ हिंडेरै आयो । एउटा आर्टिस्टले चाह्यो भने गर्न सक्ने रहेछ ।’ अनुप बराल ‘प्रकाश’का कास्टिङ डिरेक्टर हुन् ।
नायक प्रदीप खड्का शिर्ष भूमिकामा प्रस्तुत भएको फिल्म ‘प्रकाश’ भदौ १० गतेबाट प्रदर्शनमा आउँदैछ । चकलेटी नायक प्रदीपले ‘प्रकाश’मा भिन्न भूमिका निभाएका छन् । दिनेश राउत निर्देशित फिल्ममा प्रदीप जुम्लाको सरकारी विद्यालयको शिक्षाक बन्न संघर्षरत युवाको भूमिकामा छन् । हालसम्म सार्वजनिक ‘प्रकाश’को झलकहरुमा प्रदीपको लुक्सलाई रुचाइएको छ ।
यस्तै अनमोल केसीसँग वर्कसप गरेको र पल शाहसँग कामको हिसाबले चिनजान नभएको अनि धेरै जसो म्युजिक भिडियोमा देखेको अनुपले बताएका छन् । अनुप बराल निर्देशित फिल्म ‘दोख’ यही असार २४ गतेदेखि प्रदर्शनमा आउँदैछ । फिल्ममा दिया मास्के र मनिष निरौलाको मुख्य भूमिका छ ।