कल्याणकारी कोषद्वारा स्व.राणाको परिवारलाई १ लाख प्रदान
स्वर्गीय कलाकार बीएस राणाकी पत्नी र छोरीको उपचारर्थ चलचित्रकर्मी कल्याणकारी कोषबाट एक लाख रुपैयाँ सहयोग गरिएको छ । चलचित्र विकास बोर्ड अन्तर्गत रहेको कोषले बुधबार ललितपुरस्थित स्नेही काखमा पुगेर बोर्डका अध्यक्ष भुवन के.सी र कल्याणकारी कोषकी संयोजक बशुन्धरा भुषालले रकम हस्तान्तरण गरेका हुन् ।
सहयोग रकम हस्तान्तरण गर्दै बोर्ड अध्यक्ष केसीले राहत कोषमा जरुरी रहेको रकम अझै जुट्न नसकेको कारण इच्छा भएर पनि अप्ठेरोमा धेरै रकम सहयोग गर्न सकिने अवस्था नरहेको बताए । ‘यदि हामीसँग पर्याप्त रकम भईदिएको भए हामीले दिल खोलेर सहयोग गर्न सक्थ्यौँ । कोष बाहेक बोर्डले अलग्गै आर्थिक सहयोग गर्न सक्ने अवस्था पनि छैन् । हामीसँग त्यो क्षेत्राधिकार नै छैन’, अध्यक्ष केसीले भने, ‘पूर्वराष्ट्रपति विद्या देवि भण्डारीज्यूले कोषमा रकम जम्मा गर्नको लागि आवश्यक पहल गर्ने आश्वासन दिनुभएको थियो, आशा गरौँ राज्यको तर्फबाट कोषमा उल्लेख्य रकम थप हुनेछ ।’
साथै केसीले आफु अध्यक्ष भएर बोर्ड आउने बित्तिकै तत्कालिन प्रधानमन्त्री शेरबहादुर देउवालाई पनि यो कुरा राखेको र त्यो समयमा उहाँ सकारात्मक रहेको बताउँदै राज्यले कलाकारहरुलाई बिशेष चासोमा राख्नुपर्ने आवश्यकता औँलाउनुभयो ।
गत फागुन १५ गते राणाकी पत्नी र छोरीलाई काठमाडौँको गोलढुंगाबाट उद्धार गरेर उपचारका लागि अस्पताल भर्ना गरिएको थियो । स्नेही काखले उद्धार गरेर अस्पताल भर्ना गरेको थियो ।
