लण्डनको ‘आईम्याक्स सिनेवल्र्ड’मा ‘गोर्खा वारियर’को प्रिमियर
फिल्म ‘गोर्खा वारियर’को प्रिमियर बेलायतकै सान मानिएको लिसेस्ट स्क्वायर लण्डनको ‘आईम्याक्स सिनेवल्र्ड’मा गरिने भएको छ । सम्भवतः नेपाली फिल्मको इतिहासमा पहिलो पटक त्यहाँ रेड कार्पेट प्रिमियर गर्न लागिएको हो ।
यो प्रिमियर सन २०२३ सेप्टेम्बर १० आईतबार गरिने निर्देशक मिलन चाम्सले छ । यो प्रिमियरमा दुई हजार दर्शकलाई फिल्म ‘गोर्खा वारियर’ देखाईने निर्माता तथा निर्देशक चाम्सको भनाई छ । ‘नेपाली चलचित्रलाई विश्वव्यापी बजारमा पुर्याउने नेपालीहरुले देखेको सपनालाई ‘गोर्खा वारियर’ मार्फत अब साकार पारिने भएको छ । नेपालीहरु शाहसीको रुपमा विश्वमा चिनाउन सफल नेपाली गोर्खा सैनिकको बीरगाथामा यो चलचित्र आधारित रहेको छ’, मंगलबार आयोजित प्रेसमिटमा चाम्सले भने ।
लिसेस्ट स्क्वायर लन्डनको ‘आईम्याक्स सिनेवल्र्ड’ मा गरिने फिल्म ‘गोर्खा वारियर’को यो प्रिमियरमा हलिउडका विभिन्न सेलिब्रेटीहरु, हलिउडकै फिल्म डिस्ट्रिब्युटरहरुसँगै बेलायतका राजपरिवार, सांसदहरु, स्थानीय निकाय प्रमुखहरु, बेलायती सैनिकका जनरल, बृटिस गुर्खा सैनिकका विभिन्न ओहदाका अफिसरहरु, बेलायतमा रहेको नेपाली राजदुतावास, काउन्सिलका पदाधिकारीहरु, विभिन्न सरकारी र गैर सरकारी संघ संस्था एवम् निकायका उच्च ओहदाका व्यक्तित्वहरुलाई निमन्त्रणा गरिने उनको भनाई छ । यस्तै नेपालबाट नेपाल सरकारका विशिष्ट व्यक्तिहरुलाई पनि सो प्रिमियरमा निमन्त्रणा गरिनेछ ।
लिसेस्ट स्क्वायर लन्डनको ‘आईम्याक्स सिनेवल्र्ड’बाट सुरु भएको फिल्म ‘गोर्खा वारियर’को प्रिमियरलाई सेप्टेम्बर महिना भरी निरन्तरता दिईने भएको छ । सेप्टेम्बर २०२३ लाई ‘गोर्खा वारियर’को प्रिमियर महिनाको रुपमा मनाईने भएको छ । यो फिल्मलाई बेलायतपछि हङकङ, सिँगापुर लगायत विभिन्न देशमा पनि सेप्टेम्बर महिनाभरी प्रिमियर गर्ने तयारी भईरहेको पनि निर्देशक चाम्सले जानकारी गराए ।
सन १९४९ को ‘मलाया इमरजेन्सी जँगल वार’मा गोर्खाली सैनिकको शाहसिक युद्ध कथालाई यो फिल्ममा उतारिएको छ । फिल्म गोर्खा वारीयर नेपाली, अँग्रेजी र हिन्दी गरी तीन भाषामा रिलिज हुँदैछ । यो फिल्मलाई हलिउडको बितरक कम्पनीले विश्वव्यापी वितरण गर्दै छ । यसको हिन्दी र अँग्रेजी सँस्करण पनि अन्तिम तयारी अवस्थामा छ ।