नयाँ निर्देशक र निर्माण टिमले ’होस्टेल ३’ बनाउने
नेपाली फिल्म क्षेत्रमा थुप्रै स्टार कलाकारहरू जन्माएको सफल सिरिज ’होस्टेल’को तेस्रो भाग ’होस्टेल ३’ बन्ने भएको छ ।
फिल्मको तेस्रो भागलाई सशान कँडेलले निर्देशन गर्नेछन् भने माधव शर्माले स्क्रिप्ट लेखेका छन् । यसको कथा भने निर्देशक कँडेलले नै लेखेका हुन् ।
’होस्टेल’ र ’होस्टेल रिटर्न्स’ लाई सुनिल रावलले बनाएका थिए भने ’होस्टेल ३’मा उनको लगानी रहने छैन् । उनले आफु पनि एक महत्वपर्ण कलाकार रहने गरी सम्मान इन्टरटेन्मेन्टलाई फिल्म निर्माण गर्न अनुमति दिएको उल्लेख गरेका छन् । यसअघि वि.सं. २०७६ सालमा निर्माता रावल आफैले निर्देशन गर्ने गरी ’होस्टेल ब्याक अगेन’ शीर्षकमा तेस्रो भाग बनाउने तयारी गरेका थिए, जुन बन्न सकेन ।
सम्मान इन्टरटेन्मेन्टले आरोन कन फिल्म्ससँगको सहकार्यमा ’होस्टेल ३’ बनाउनेछ । निर्माताको रूपमा शिशिर ज्ञवाली, कार्यकारी निर्माता शङ्कर कोइराला, सह निर्माताहरू सुधा मरहट्ठा, सुरेश कँडेल र अर्जुन सापकोटा रहेका छन् ।
वि.सं. २०७० सालमा रिलिज भएको ’होस्टेल’लाई हेमराज बिसीले निर्देशन गरेका थिए भने २०७२ मा रिलिज भएको ’होस्टेल रिटर्न्स’लाई सुरज भुसालले निर्देशन गरेका थिए । यी दुवै चलचित्र ’टीनएज ड्रामा’मा आधारित थिए । घरेलु बक्स अफिसमा दुवै फिल्म सफल भएका थिए।
’होस्टेल ३’का निर्देशक कँडेलले तेस्रो भागमा होस्टेलमा बसेर अध्ययन गरिरहेका टिनेजर र उनीहरूको भविष्यका घटनाहरूमा आधारित रहने बताए । उनले यस फिल्मबाट पनि अघिल्ला भागहरूमा जस्तै केही स्टार कलाकारको जन्म हुने सङ्केत गरे । ’होस्टेल’बाट अनमोल केसी, सलोन बस्नेत, प्रकृति श्रेष्ठ, गौरव पहारी लगायतका कलाकारहरूले डेब्यु गरेका थिए ।
त्यस्तै, ’होस्टेल रिटर्न्स’बाट स्वस्तिमा खड्का, सुशील श्रेष्ठ, नजिर हुसेन, सुशील सिटौला लगायतका कलाकारहरूले डेब्यु गरेका थिए । पहिलो पटक फिल्म निर्देशन गर्न लागेका सशान कँडेल डेढ दशक देखि गायक र म्युजिक भिडियो निर्देशकको रूपमा सक्रिय छन् ।
फिल्मका प्राविधिक टिम र कलाकारहरू प्रेसमिट गरी सार्वजनिक गर्ने तयारी रहेको निर्देशक कँडेलले बताए । यस वर्षको अन्त्यतिर रिलिज लक्ष्य राखिएको निर्देशकले बताए ।